(نعیم اللہ باجوہ آسٹریلیا)
زندگی کے اسرار میں سب سے پیچیدہ سوال یہ نہیں کہ موت کے بعد حیات ممکن ہے یا نہیں، بلکہ یہ ہے کہ موت سے پہلے تم زندہ ہو یا نہیں؟ حیات کی یہ مختصر مہلت محض سانسوں کے تسلسل کا نام نہیں بلکہ احساس، شعور اور مقصد کی بیداری کا مطالبہ کرتی ہے۔
زندگی وہ لمحہ ہے جب تمہارے دل کی دھڑکن کسی خواب کی تعبیریں تلاش کرتی ہے، جب تمہارا ذہن تخلیق کے امکانات سے معمور ہوتا ہے، اور جب تمہاری روح انسانیت کی خدمت کے جذبے سے سرشار ہوتی ہے۔ زندہ وہ نہیں جو صرف جسمانی وجود رکھتا ہو، بلکہ وہ ہے جو ہر لمحہ اپنی ذات کی گہرائیوں میں جھانک کر زندگی کے حقیقی مفہوم کو تلاش کرے۔
موت سے پہلے زندہ رہنے کا مطلب ہے اپنی ذات سے آگے بڑھ کر دوسروں کے لیے جینا، زندگی کے نشیب و فراز کو ایک آزمائش کی بجائے ایک موقع سمجھنا، اور ہر روز اس شعور کے ساتھ جینا کہ کل کا کوئی وعدہ نہیں۔ وہ شخص زندہ نہیں جو اپنی زندگی صرف وقت کے بہاؤ میں گزار دے، بلکہ وہ ہے جو ہر لمحے کو معنویت سے بھر دے۔
پس اے انسان! اپنے وجود کا قیدی نہ بن بلکہ اپنی زندگی کو مقصد اور معنویت کے اعلیٰ معیار پر پورا اتار۔ کیونکہ اصل کامیابی یہ نہیں کہ موت کے بعد کیا ہوگا، بلکہ یہ ہے کہ موت سے پہلے تم نے اپنی زندگی کو کس طرح جیا۔