پتھر ایتھے ہر جاندے نیں چیتا رکھیں
ککھ ڈب کے تر جاندے نیں چیتا رکھیں
زمین اُتے آکڑ کے چلن والے قسمے رب دی
اوڑک اک دن نگھر جاندے نیں چیتا رکھیں
اے دنیا ای ایتھے حرف دھرن والے
بدو بدی دھر جاندے نیں چیتا رکھیں
بولن توں پہلاں سوچیا کر اکھراں نال
انکھاں والے مر جاندے نیں چیتا رکھیں
ہاسے نال وی کدی آکھی دا نئیں
کرن والے کر جاندے نیں چیتا رکھیں
کسے دے اندر جھاتی مارن والے نعیم
کد فیر اپنے گھر جاندے نیں چیتا رکھیں